呢一排返學校, 都冇咩特別野做, 朝早學生返黎, 又係咩球類活動, 其實大部份學生都係得個悶字, 下午, 學生走晒, 學校就更悶, 不過, 呢排o既下午, 我地都有節目, 就係夾歌喇。

其實係因為今日有一個綜合表演, 麥sir 就叫我地上台唱歌, 咁攪攪下就話夾band 喇。 本身就得余仔and 阿禮識玩樂器, 咁少點得呀, 咁所以臨時就搵左我打鼓, 阿孔彈base, ha, 咁都得。

我地決定唱兩首歌, 第一首係與我常在, 第二首係光輝歲月, 其實打鼓唔算難學, 都係記住首歌點打點打, 到咩位就點打法咁就得了, 不過玩玩下覺得打鼓幾過引。

練左好幾日, 今日終於要表演喇, 好耐冇表演過, 應該話, 都冇試過上台唱歌o既。 唱第一首歌, d 學生冇咩反應, 冇計啦, 預左, 因為佢地悶左成朝了, 到第二首歌, 光輝歲月係high d o既, 加埋阿禮o既發din, 都叫做有d 氣氛~~

正所謂, 台上一分鐘, 台下十年功, 雖然, 我都係玩左打鼓果幾日, 唔叫做十年功, 但總算係好認真地去練好呢兩首歌, 表演完, 就好似咩都冇咁, 之後o既下午, 就唔駛再練歌, 亦都冇咩機會可以打下鼓, 更加可惜o既係, 我都走喇, 我諗都再冇機會有呢個臨時樂隊出現了~~

灰d 咁睇, 就係玩完就咩都冇, 樂觀d 咁睇, 就係o係臨走時都可以玩埋佢, 可以俾番個回憶自己, 咁就不如樂觀d, 接受呢個事實, 既然都知道自己要走, 咁就......揮一揮衣就, 不帶走一點雲彩。

30/6/2008 邦